كانت
بتفتش فى الظلمه
عن حلم نساها زمان
على باب الوجع المحنى /
من كتر حمول الأيام
وبتفرد ..
فى ملامح هذا الحلم ال نساي
أحيانا ..
كانت صوابعها تتهوه /
داخل تجاويف الوش
من فعل دموع الصبار
زي السيل /
ال هارب من جبل التوهه
ومسلم عطشه ..
للبحر المالح
لساه الحلم ال نساي
بيعاود توهانه
و البنت بتفرد ..
فى شعاع العين المتكرمش /
جوه الننى
تتذكر ..
فى ملامح آخر فرح /
خطفاه الحدايه
وانها حامل ..
فى الشهر الستين
وبتقرا يوماتى ..
ياسين
تستعوذ
من فعل الانسان اللى اتسبب /
فى بطاله لجيش الشياطين
وبترسم ..
صورة فارس
مش باين فى ملامحه
غير صوت الريح
هربان الدرع من الفارس
وقعان السيف
و الفرس اتبخر
وايطار اللوحه
له طعم الزيف
لساها الظلمه النايمه فى عين البنت
لساه الحلم النساي ماعاودش
وخريف
بيجر خريف
على وش البنت
تجاعيد الزيف