((((( وفتحت لك )))))))

و فتحت لك ..
قلبى المريض لأجل نداويه
سميتى آه ..
ودخلتى فيه
بس الغريبه ان المواجع كلها /
صابها الكسوف
دارة ومسحت وشها واتبسمت
نورتى بيتك يا .............
وقعت حروف الوجع /
من فوق لسان الأسئله
واتنهدت
مالك حزينه والدموع متفرفطه
مش كنتى جايه لأجل متداوى الجراح
ليه واقفه فوق حيرتك ..
بتعدى و بتحسبى
ايه اللى باقى من الزمن /
وايه اللى راح
كم بسمه دبلت ع الشفايف ..
كم بسمه ملفوفه بجراح
مالك حزينه و الدموع متفرفطه
و الغنوه ليه طعم النواح
مش كنتى جايه ..
لأجل متداوى المريض
وسمحت لك تتنقلى /
من وريد لوريد
ايه الجديد
لو تسمحى
قوليلى ايه ممنوع عليه
وليه ايه فيكى مباح
ما أنا اصلى كنت عشمان فى العلاج
أتاريكى داخله القلب بخزاين قارون
مليانه آه ..
بس بوجع
لو تسمحى لى مره واحده ببسمتك
من غير مانحسب فى اللى جاي
من غير مانبكى ع اللى راح
لو مره وحده تسمحى ..
وتملسى
فوق الجراح